Z Chaiseraugscht gilt offiziell dr Bruuch vo dr alte Fasnacht (au Herrefasnacht gnennt), wo mit de Schmutzige Dunnschtig (Faisse) schtartet und bis am Äschermittwoch duured. Dr Startschuss macht d'Zepterübergoob bi dr Gmein. Es spiele d'Dorfgugge und es git e tolle Glüehwhy und öppis zwüsche d'Zähn! E tolle Start!

Dr Fasnachtsumzug findet jewils am Samschtig nach em dritte Faisse schtatt. Teilneh düend Wageclique, Guggemuusige, Muusiggruppe, Schissdräckzügli, Einzelmaske und Individualischte. Obwohl mir immer mehr Gruppe chönne zum Mitmache motiviere, schtoot euse Umzug im Vergliich zu andere Ort under em Motto «klein aber fein». Schtarte duet er jewils am Nomidag nach de zwei mit emene Böllerschuss und schlänglet sich aschliessend in gemächlichem Tempo durchs Dorf. Nach em Umzug goht uf em Schuelhuusplatz in de Reschtorant und in de Cliquebeizli d Poscht ab. Bis in spötere Obe wärde nämlich überall in lockerer Reihefolg luschtigi und unterschiidlichschti Schnitzelbänk gsunge und musikalische Unterhaltig bote.

Am Mentig druff findet in dr Turnhalle im Dorf s grosse Finale schtatt. Es isch das eigentlich e Widerholig vo de Darbietige, wo am Sunnntig in de Beize teilwiis under nid grad optimale akustische Verhältnis bote worde sind. Am Mentig cha me also nomoll in aller Rueh lose, gniesse und lache. Well an däm Obe de Aktöre uf dr Bühni enormi Ufmerksamkeit gschänkt wird, vermöge sich d Darbietige vom Samschtig oft sogar nomoll z schteigere!

Am Zischtignomidag chömme denn die junge Fasnächtler uf ihri Rächnig und es herrscht bunts und luschtigs Triibe in dr Turnhalle.

Im Fasnachtsfüür, wo ufemene Floss uf em Rhy lodered, wird am Obe vom Äschermittwoch e Fasnachtspuppe verbrennt. E Bsunderheit vo Chaiseraugscht isch an däm Alass au s «Schiibeschiesse», wo enere alte Tradition entschpricht und bsunders sehenswärt isch. Das isch denn dr offizielli Abschluss vo dr Chaiseraugschter Fasnacht.